ఆహా.. అల్లు అరవింద్ మరో సినిమా కొనేసాడు!


ఆహా.. అల్లు అరవింద్ మరో సినిమా కొనేసాడు!
ఆహా.. అల్లు అరవింద్ మరో సినిమా కొనేసాడు!

ట్రెండ్ కు తగ్గట్లు అప్డేట్ అవ్వడంతో మెగా నిర్మాత, గీతా ఆర్ట్స్ అధినేత అల్లు అరవింద్ ఎప్పుడూ ముందుంటాడు. అందుకే దాదాపు 35 ఏళ్ల నుండి సక్సెస్ఫుల్ నిర్మాతగా కొనసాగుతున్నాడు. ఇప్పటికీ గీతా ఆర్ట్స్ నుండి సినిమా వస్తోందంటే అది హిట్ అన్న నమ్మకంతోనే ప్రేక్షకులు థియేటర్లకు వస్తుంటారు. ఇక ఒక సినిమాకు పాజిటివ్ టాక్ వచ్చిందంటే దాన్ని మరో లెవెల్ కు తీసుకెళ్లడంలో అల్లు అరవింద్ శైలే వేరు. సినిమాలతో తనను తాను అప్డేట్ చేసుకునే అల్లు అరవింద్, సాంకేతికంగానూ అప్డేట్ అయ్యి డిజిటల్ స్ట్రీమింగ్ రంగంలోకి అడుగుపెట్టిన విషయం తెల్సిందే.

ఇప్పటికే డిజిటల్ విప్లవం సినిమా రంగంలోకి చొచ్చుకుని వచ్చేసింది. అమెజాన్ ప్రైమ్, హాట్ స్టార్, జీ 5, సన్ నెక్స్ట్, ఈటివి విన్ వంటి డిజిటల్ మాధ్యమాలు తెలుగు సినిమాలను అందిస్తున్నాయి. లేటెస్ట్ గా ఈ లిస్ట్ లోకి అల్లు అరవింద్ తన ఆహా యాప్ తో వచ్చాడు. ఈ యాప్ ఇప్పుడు లైవ్ లోకి వచ్చేసింది కూడా. పెయిడ్ సబ్స్క్రిప్షన్ ఉన్న ఈ యాప్ లో ఇప్పుడు నిఖిల్ నటించిన లేటెస్ట్ హిట్ అర్జున్ సురవరం స్ట్రీమ్ అవుతోంది. త్వరలోనే కార్తీ లేటెస్ట్ బ్లాక్ బస్టర్ ఖైదీ కూడా రానుంది. వీటితో పాటు తెలుగులో వచ్చిన పాత బ్లాక్ బస్టర్లు కూడా స్ట్రీమ్ అవుతున్నాయి. కొత్తవాటికి సబ్స్క్రిప్షన్ కావాలి కానీ పాతవి ఫ్రీగానే స్ట్రీమ్ అవుతున్నాయి.

ఇప్పుడు అల్లు అరవింద్ మరో సినిమాను కొనుగోలు చేసాడు. టేస్ట్ ఉన్న నిర్మాతగా పేరు తెచ్చుకున్న రాజ్ కందుకూరి తన కొడుకు శివ కందుకూరిని హీరోగా పెట్టి నిర్మించిన చూసి చూడంగానే చిత్రాన్ని అల్లు అరవింద్ చూసి దాదాపు కోటి రూపాయలకు ఈ సినిమాను ఆహా యాప్ కు కొనుగోలు చేసినట్లు తెలుస్తోంది. ఈ చిత్ర రన్ టైమ్ కేవలం గంటా 54 నిముషాలు ఉందని తెలుస్తోంది. రాజ్ కందుకూరి నిర్మించిన పెళ్లి చూపులు, మెంటల్ మదిలో రెండూ భిన్నమైన చిత్రాలుగానే పేరు తెచ్చుకున్నాయి. మరి ఈ చూసీ చూడంగానే ఎలా ఉంటుందో చూడాలి.