సూపర్ స్టార్ సినిమా మాస్ కే బాస్ అంటున్నారే!


సూపర్ స్టార్ సినిమా మాస్ కే బాస్ అంటున్నారే!
సూపర్ స్టార్ సినిమా మాస్ కే బాస్ అంటున్నారే!

సూపర్ స్టార్ రజినీకాంత్ కు ఒకప్పుడు ఇక్కడి హీరోలతో సమానమైన మార్కెట్ ఉండేది. రజిని సినిమా వస్తోందంటే ఇక్కడ ఓ రేంజ్ లో హంగామా ఉండేది. ఓ రేంజ్ ఉన్న హీరోలు కూడా తమ సినిమాలని వాయిదా వేసుకోవాల్సిన పరిస్థితి ఉండేది. ఆయన సినిమాలు ఇక్కడ 30 కోట్ల బిజినెస్ చేసిన రోజులు కూడా ఉన్నాయి. అలాంటి రజినీకాంత్ కు రోబో తర్వాత సరైన హిట్ లేదు. మధ్యలో మరీ నాసిరకమైన సినిమాలు చేసాడు. కెరీర్ మొత్తం ఫ్యాన్స్ కు ఎలాంటి సినిమాలు నచ్చుతాయో అలాంటివే చేసిన రజిని, రోబో తర్వాత ఎందుకో క్లాస్ సినిమాలు అంటూ కొత్త రాగం అందుకున్నాడు. కావాలని ఫైట్లు తగ్గించేయడం, తన మార్క్ మ్యానరిజమ్స్ ఏం పెట్టకపోవడం వంటివి చేసాడు. దాంతో రజిని ఫ్యాన్స్ సైతం నిరుత్సాహపడాల్సిన పరిస్థితి.

కబాలి, కాల సినిమాలతో ఎంతో నెగటివిటీ కూడా వచ్చింది. ఎందుకని రజిని ఫ్యాన్స్ మనసుని అర్ధం చేసుకోవట్లేదు అంటూ వారు ఆవేదన చెందారు. ఆ ఎఫెక్ట్ పేట చిత్రంపై గట్టిగా పడింది. ఈ సినిమా కంటెంట్ బాగున్నప్పటికీ కలెక్షన్స్ చాలా సాదాగా వచ్చాయి. తమిళంలో ఓ మాదిరి హిట్టైన పేట, తెలుగులో మాత్రం ప్లాపైంది. ఇలా వరసగా హిట్ అన్నదే లేకపోవడంతో రజినీ మార్కెట్ తెలుగులో బాగా దెబ్బతింది. పేట సినిమాకు సాదాసీదా బిజినెస్ చేసినా మొత్తం రికవర్ కాలేదు.

దాంతో దర్బార్ కు పరిస్థితి మరింత దిగజారింది. అసలు ఈ సినిమా సంక్రాంతికి వస్తోందన్న సందడే లేదు. ముఖ్యంగా తెలుగులో ఈ సినిమాను కాంపిటీషన్ గా కూడా తీసుకోవట్లేదు. అయితే దర్బార్ తో రజినీ, మురుగదాస్ కలిపి షాక్ ఇవ్వబోతున్నట్లు తెలుస్తోంది. రజనీ ఈసారి పూర్తి స్థాయి మాస్ మసాలా సినిమాను అందించబోతున్నాడట. మురుగదాస్ విషయమున్న దర్శకుడు. తన రీసెంట్ సినిమాలు అంత బాగా ఆడనంత మాత్రాన దర్బార్ ను తక్కువ అంచనా వేయడానికి లేదు. దర్బార్ పాటలు తమిళంలో విడుదలయ్యాయి. అవి పూర్తిగా మాస్ బీట్లతో మాస్ ప్రేక్షకులను అలరించేవిగా ఉన్నాయి. దీన్ని బట్టే రజినీ ఈసారి స్టైల్ మార్చాడని, ఈ సంక్రాంతికి దుమ్ము రేపడం ఖాయమని అంటున్నారు. చూద్దాం మరి ఏం జరుగుతుందో.