దిల్ రాజు ఇద్దరి లోకం ఒకటే అలా సెట్టైంది


దిల్ రాజు ఇద్దరి లోకం ఒకటే అలా సెట్టైంది
దిల్ రాజు ఇద్దరి లోకం ఒకటే అలా సెట్టైంది

దిల్ రాజు.. టాలీవుడ్ లోనే అగ్రనిర్మాత. ఈ ఏడాది రెండు బంపర్ హిట్లు కొట్టిన దిల్ రాజు, హ్యాట్రిక్ విజయాలతో ఈ సంవత్సరానికి స్వస్తి చెప్పాలని అనుకుంటున్నాడు. ఈ ఏడాది దిల్ రాజు నిర్మించిన ఎఫ్ 2, మహర్షి ఎంత పెద్ద సక్సెస్ అయ్యాయో ప్రత్యేకంగా చెప్పాల్సిన పనిలేదు. ఈ రెండు సినిమాలూ కూడా దిల్ రాజుకు బానే లాభాలు తీసుకొచ్చాయి. ఇక మూడో సినిమాగా రాజ్ తరుణ్ హీరోగా ఇద్దరి లోకం ఒకటే అనే సినిమాను నిర్మించాడు. ఈ సినిమా షూటింగ్ ఎప్పుడో పూర్తయింది. సెన్సార్ కూడా అయిపోయి కొన్ని వారాలు అవుతోంది. కానీ సరైన రిలీజ్ డేట్ కోసం ఎదురుచూస్తూ సినిమాను అలానే ఉంచేసాడు. ఫైనల్ గా డిసెంబర్ 25న ఈ చిత్రాన్ని విడుదల చేస్తున్నట్లు ప్రకటించాడు దిల్ రాజు.

ప్రస్తుతం రాజ్ తరుణ్ కెరీర్ ఏమంత ఆశాజనకంగా లేదు. ఈ యంగ్ హీరో హిట్ కొట్టి చాలా కాలమైంది. దిల్ రాజు.. రాజ్ తరుణ్ ను హీరోగా పెట్టి తెరకెక్కించిన లవర్ దారుణమైన ఫలితాన్ని అందుకుంది. ఈ సినిమా దిల్ రాజు తీసుకున్న బ్యాడ్ డెసిషన్స్ లో ఒకటి. బడ్జెట్ ను ఎప్పుడూ కంట్రోల్ లో పెట్టుకునే దిల్ రాజు, ఈ సినిమాకు మాత్రం ఈ విషయంలో ఘోరంగా విఫలమయ్యాడు. పెద్ద సినిమాలను కూడా ఎంతో క్లారిటీగా నిర్మించి, పక్కా ప్రణాళికతో సినిమాలను రిలీజ్ చేస్తుంటాడు, కానీ లవర్ విషయంలో మాత్రం లెక్కలన్నీ తప్పాయి. బడ్జెట్ పరిమితులు దాటి వెళ్ళిపోయింది. బిజినెస్ కూడా అనుకున్న రేంజ్ లో జరగలేదు. ఫైనల్ గా సినిమా కూడా అటకెక్కింది.

రాజ్ తరుణ్ తో పెద్ద ప్లాప్ కొట్టినా కానీ మళ్ళీ తనతోనే సినిమాను నిర్మించాడు దిల్ రాజు. ప్రస్తుతం అసలు మార్కెట్ లేని రాజ్ తరుణ్ తో దిల్ రాజు ఎందుకు సినిమా నిర్మించాడా అన్నది ఎవరికీ అంతుచిక్కలేదు. దీనికి రీసెంట్ గా సమాధానమిచ్చాడు ఈ అగ్రనిర్మాత. దిల్ రాజుకు తెలియకుండా ఇద్దరి లోకం ఒకటే కథ విన్న రాజ్ తరుణ్, దిల్ రాజు వద్దకు వెళ్లి ఈ సినిమా చేస్తానని అడిగాడట. ఈ చిత్ర దర్శకుడు జీఆర్ కృష్ణ ఒక టర్కీ సినిమా చూసి ఇన్స్పైర్ అయ్యి ఈ కథను రాసుకున్నాడని, అయితే దాన్ని మన నేటివిటీకి తగ్గట్లుగా మార్పులు చేసి సిద్ధం చేశామని, అప్పుడే రాజ్ తరుణ్ వచ్చి అడగడంతో అతనితోనే ముందుకెళ్లినట్లు తెలిపాడు.

చిన్నప్పటినుండి కలిసి పెరిగిన హీరో, హీరోయిన్ మధ్య ప్రేమ ఎలా చిగురించింది. వారి మధ్య వచ్చిన మనస్పర్థలు ఎలాంటివి, చివరికి ఎలా ఒకటయ్యారు అనే పాయింట్ మీద ఈ చిత్రం తెరకెక్కిందిట. చూస్తుంటే ఇదేమి ఫ్రెష్ ఐడియా కాదు. నువ్వే కావాలి, ఆనందం తరహాలో ఉన్న లవ్ స్టోరీ అనిపిస్తోంది. అయితే ట్రీట్మెంట్ సరికొత్తగా ఉంటుందని దిల్ రాజు నమ్మకంగా ఉన్నాడు. చూడాలి మరి రాజు గారు ఈ ఏడాది హ్యాట్రిక్ కొడతారో లేదో.