“మా.. డైరీ” రిలీజ్ వేదికగా మళ్లీ రచ్చ


“మా.. డైరీ” రిలీజ్ వేదికగా మళ్లీ రచ్చ
“మా.. డైరీ” రిలీజ్ వేదికగా మళ్లీ రచ్చ

తెలుగు సినీ పరిశ్రమలో ఎంతైనా స్టార్ల మధ్య ఐకమత్యం తక్కువ అన్న విషయం మరొక సారి రుజువైంది. కొద్దిసేపటి క్రితమే జరిగిన మూవీ ఆర్టిస్టు అసోసియేషన్ డైరీ ఆవిష్కరణ కార్యక్రమంలో మరొకసారి సభా మర్యాద మరిచిపోయి మాట మాట అనుకునే స్థాయికి వీళ్ళ విభేదాలు వెళ్లాయి. వివరాల్లోకి వెళితే, ఈరోజు జరిగినటువంటి మూవీ ఆర్టిస్ట్ అసోసియేషన్ మా డైరీ ఆవిష్కరణ కార్యక్రమంలో భాగంగా రెబల్ స్టార్ కృష్ణం రాజు గారు మరియు మెగాస్టార్ చిరంజీవి, మురళీమోహన్, కళాబంధు శ్రీ సుబ్బిరామి రెడ్డి గారు లాంటి అతిధులు ఈ కార్యక్రమంలో పాల్గొన్నారు. ఈ కార్యక్రమాన్ని నిర్వహించే బాధ్యత నరేష్ గారు మరియు పరుచూరి గోపాలకృష్ణ గారు తీసుకోగా, మధ్యలో కొన్నిసార్లు జీవిత గారు మరియు రాజశేఖర్ గారు కలగజేసుకుని, వారి వంతుగా కొంత మందిని వేదికపైకి పిలుస్తూ కొద్దిగా ప్రహసనం తలపించే విధంగా ప్రవర్తించారు.

ఈ సందర్భంగా పరుచూరి గోపాలకృష్ణ గారు మాట్లాడుతున్నప్పుడు మధ్యలో అంతరాయం కలిగించే విధంగా రాజశేఖర్ గారు ప్రవర్తించి మైకు తీసుకుని, మూవీ ఆర్టిస్ట్ అసోసియేషన్ పదవీ బాధ్యతలు చేపట్టినప్పటి నుంచి “తాను సినిమాల కంటే ఎక్కువగా మా కోసమే పని చేస్తున్నాము.. కానీ మాకు సరైన గుర్తింపు మర్యాద గౌరవం దక్కడం లేదు. నిప్పు లేకుండా పోగా రాదు. లైఫ్ లో భాగంగా సినిమాల్లో హీరోగా నటించడం కాదు రియల్ లైఫ్ లో కూడా హీరోగా పనిచేయాలి. అలానే రియల్ లైఫ్ లో హీరో గా పని చేస్తుంటే నన్ను కొంతమంది తొక్కేస్తున్నారు..!” అని అసహనం వ్యక్తం చేశారు.

ఇక వేదికపై కృష్ణంరాజుగారు సుబ్బిరామిరెడ్డి గారు వంటి వాళ్ళు ఉండగా వీళ్ళు ఇలా ప్రవర్తించడం చూసి మెగాస్టార్ చిరంజీవి కూడా కొంచెం ఆగ్రహానికి గురయ్యారు. “కుటుంబం అన్నాక చిన్న చిన్న మనస్పర్ధలు ఉండటం సహజం. వాటిని నాలుగు గోడల మధ్య వివరంగా కూర్చొని మాట్లాడుకుని పరిష్కరించుకోవాలి. కానీ ఈ విధంగా ప్రవర్తించడం సరి కాదు అని చిరంజీవి సున్నితంగా హెచ్చరించారు. గతంలో కూడా మూవీ ఆర్టిస్ట్ అసోసియేషన్ వారి మధ్య విభేదాలు వచ్చినప్పుడు చిరంజీవి నరేష్ గారి వైపు మాట్లాడటం రాజశేఖర్ మరియు జీవిత గారికి ఆగ్రహాన్ని తెప్పించింది. మధ్యలో కొంతకాలం రాజశేఖర్ గారి కుమార్తె తెరంగేట్రం విషయంలో చిరంజీవి గారు కూడా సహాయం చేసిన సందర్భంగా ఈ గొడవలన్నీ సద్దుమణిగాయని అందరూ భావించిగా, ప్రస్తుతం ఈ రోజు మూవీ ఆర్టిస్ట్ అసోసియేషన్ డైరీని కార్యక్రమంలో జరిగిన పరిస్థితిని చూస్తే; ఇంకా తెలుగు సినిమా ఇండస్ట్రీ ఏకతాటి మీదకు రాలేదని… ఎవరికి వారే కాంపౌండ్ లు పెట్టుకొని అధిపత్యం కోసం ప్రయత్నిస్తున్నారని అర్థమవుతోంది.