కొత్త సినిమాను ప్రకటించనున్న నాగ్


కొత్త సినిమాను ప్రకటించనున్న నాగ్
కొత్త సినిమాను ప్రకటించనున్న నాగ్

కింగ్ నాగార్జునకు ఇప్పుడు కమిట్మెంట్స్ ఏం లేవు. ఇన్నాళ్లూ కొత్త సినిమా ఎప్పుడంటే బిగ్ బాస్ అయ్యాక చూద్దాం అనేవాడు. బిగ్ బాస్ హోస్ట్ చేయడం ద్వారా నాగ్ కు బాగానే ముట్టింది. 30 ఎపిసోడ్స్ హోస్ట్ చేసినందుకు గాను దాదాపు 5 కోట్ల రూపాయలు ముట్టజెప్పారు బిగ్ బాస్ యాజమాన్యం. మధ్యలో రెండు ఎపిసోడ్స్ కు నాగ్ లేకపోయినా అమౌంట్ కటింగ్ లాంటివి లేకుండా ఫుల్ పేమెంట్ ఇచ్చేసారు. ఇక నాగ్ హోస్టింగ్ సంగతి పక్కనపెట్టేస్తే ఈ మూడున్నర నెలలు ప్రేక్షకులకు దగ్గరగా ఉండటానికి ఒక వేదిక దొరికింది నాగార్జునకు. ఈ రకంగా నాగార్జునకు బిగ్ బాస్ ప్లస్ అయిందనే చెప్పాలి. వచ్చే సీజన్ బిగ్ బాస్ కు నాగార్జున హోస్టింగ్ చేస్తాడా లేదా అన్న విషయాన్ని ఇప్పుడే చెప్పలేం. ఇప్పటిదాకా తెలుగులో మూడు సీజన్లు అవ్వగా, మూడింట్లో ముగ్గురు హోస్ట్ లుగా చేసారు. మరి నాలుగో సీజన్ కు నాలుగో హోస్ట్ వస్తాడా లేక నాగ్ నే రిపీట్ చేస్తారా అన్నది చూడాలి.

ఈ విషయం పక్కనపెడితే నాగార్జున, బిగ్ బాస్ పూర్తవ్వడంతో తన ఫోకస్ మొత్తం ఇప్పుడు సినిమాలపైనే పెడుతున్నాడు. తన తర్వాతి సినిమాలను లైన్లో పెట్టాలని చూస్తున్నాడు. అయితే కెరీర్ పరంగా ఇప్పుడు నాగార్జున పరిస్థితి ఏమంత బాగోలేదు. ఎంతో నమ్మి చేసిన మన్మథుడు 2, దారుణమైన ప్లాప్ గా మిగిలింది. అంతే కాకుండా బోలెడంత చెడ్డ పేరుని కూడా మూటగట్టుకోవాల్సి వచ్చింది. నాగార్జున రీసెంట్ సినిమాలు కూడా ఫ్లోప్స్ అవ్వడంతో ఇప్పుడు తన మార్కెట్ పొజిషన్ ఏంటి, ఎలాంటి సినిమాలు తీయాలి, ఎంత బడ్జెట్ లో చేస్తే సినిమాకి మంచిది వంటి లెక్కలన్నీ వేస్తున్నాడట. ఈ నేపథ్యంలో కథలు వింటున్న నాగార్జున ఒక కొత్త దర్శకుడి కథకు ఓకే చెప్పినట్లు తెలుస్తోంది. నాగార్జున, కార్తీ కలిసి నటించిన ఊపిరి చిత్రానికి అసిస్టెంట్ రైటర్ గా పనిచేసిన సోలమన్ చెప్పిన కథకు నాగార్జున గ్రీన్ సిగ్నల్ ఇచ్చినట్లు సమాచారం. మహేష్ బాబు మహర్షి చిత్ర కథా విస్తరణలో కూడా సోలమన్ హస్తం ఉంది. వంశీ పైడిపల్లి దగ్గర ఇన్నాళ్లూ పనిచేసిన సోలమన్ ఇప్పుడు దర్శకుడు అవ్వాలనే ప్రయత్నంలో ఉన్నాడు.

కథ నచ్చినా కానీ ఇప్పుడున్న పరిస్థితుల్లో కొత్త దర్శకుడికి అవకాశం ఇవ్వడం కరెక్టేనా అన్న సందేహం నాగార్జునకు ఉందిట. చాలా రోజులు ఆలోచించిన తర్వాత కథ బాగుంది కాబట్టి ముందుకెళదామని డిసైడ్ అయినట్లు తెలుస్తోంది. ఈ చిత్రానికి సంబంధించిన మరిన్ని వివరాలు త్వరలో తెలుస్తాయి. త్వరలోనే ఈ చిత్రాన్ని మొదలుపెడతారు. నాగార్జున ఇప్పుడు రెగ్యులర్ కమర్షియల్ ఎంటెర్టైనెర్స్ చేసే పరిస్థితి లేదు. ఈ నేపథ్యంలో నాగ్ ఎలాంటి సినిమా ఎంచుకున్నాడోనన్న ఆసక్తి మొదలైంది. మరోవైపు నాగార్జున ఎప్పటినుండో పెండింగ్ లో పెట్టిన బంగార్రాజు సినిమా విషయం ఏమైందన్న దానిపై ఎటువంటి సమాచారం లేదు. బిగ్ బాస్ అయ్యాక బంగార్రాజు షూటింగ్ మొదలుపెడతారని అందరూ అనుకున్నారు. అయితే నాగ్ దీనిపై స్పందించట్లేదు.